Il-miżbliet t’Għallis u Ta’ Żwejra huma żewġ miżbliet oħra li jinstabu fil-Kumpless ECOHIVE. Il-miżbla Ta’ Żwejra kienet l-ewwel miżbla kkontrollata ta’ Malta li ġiet żviluppata għar-rimi tal-Iskart Solidu Muniċipali b’mod sigur u sostenibbli. Kienet użata, primarjament, bejn l-2004 u l-2006 u issa m’għadhiex tintuża. Il-miżbla tal-Għallis, mill-banda l-oħra, hija l-faċilità ta’ miżbla kkontrollata ta’ WasteServ maħsuba għat-tul u għadha tintuża sal-lum il-ġurnata.

Il-miżbliet ikkontrollati huma magħmula minn saffi differenti, li jinkludu membrani ġeo-sintetiċi u ġeo-tessili li ma jħallux il-leachate jinfiltra l-art. B’hekk, tiġi protetta l-ħamrija u l-ilma ta’ taħt l-art mit-tniġġis li jinħoloq fil-miżbliet. Dawn jinkludu ukoll sistemi t’estrazzjoni tal-gass li tippermetti l-ġbir, estrazzjoni u pproċessar tal-gassijiet, bħall-metanu, li jipproduċi l-enerġija u jnaqqas l-emissjonijiet. Dawn il-miżbliet ikkontrollati kienu ta’ żvolta fit-trattament tal-iskart f’Malta minn meta ġew introdotti għax irriżultaw fi prattiċi aħjar għat-titjib tal-ambjent.

Impjant tal-gass jintuża biex jittratta gassijiet perikolużi maqbuda f’miżbliet ikkontrollati u mill-miżbla l-qadima. Gassijiet mill-miżbla l-qadima jiġu ttrattati minn Ossidatur Termali Riġenerattiv waqt li l-gassijiet mill-miżbliet ikkontrollati jiġu ttrattati jew bis-saħħa ta’ flares għoljin fit-temperatura jew b’gass tal-miżbla mħaddem minn teknoloġija ta’ ġeneratur. Fil-każijiet kollha, l-emissjonijiet huma kkontrollati biex jiġi aċċertat li jibqgħu f’livelli aċċettabbli u siguri.

Jekk jogħġbok agħfas hawn għar-regoli tas-sit

Politika Ambjentali – Miżbla għall-Iskart mhux perikoluż tal-Għallis

Il-Maniġment u l-Persunal jirrikonoxxu li l-attivitajiet tagħna fil-Miżbla għall-Iskart Mhux Perikoluż tal-Għallis għandhom impatt fuq l-ambjent. Aħna impenjati li ntejbu kontinwament l-operat tagħna sabiex nipproteġu l-ambjent billi nnaqqsu l-impatt ambjentali tagħna u ntejbu l-prestazzjoni ambjentali. L-għan tagħna hu li nrawmu sens ta’ għarfien li jippromwovi l-benefiċċji ambjentali fil-Miżbla għall-Iskart Mhux Perikoluż tal-Għallis li tinsab fil-Kumpless ECOHIVE. 

L-għanijiet ewlenin ta’  WasteServ huma li tipproteġi l-ambjent filwaqt li tipprovdi servizz tal-immaniġjar tal-iskart affidabbli li jkun ukoll favur l-ambjent, lil dawk li jġorru l-iskart, li jipproduċu l-iskart, u li jixtru l-iskart. 

Permezz tal-operat fil-Miżbla għall-Iskart mhux perikoluż tal-Għallis u l-fergħat ta’ sostenn tagħha, WasteServ se tistinka biex:

• Tikkonforma mal-permess tal-IPPC IP 0001/24 u mal-liġijiet u r-regolamenti ambjentali kollha applikabbli; 
• Tissorvelja u tikkontrolla l-iskart li jidħol fis-sit, kif ukoll l-immaniġġjar, il-ħażna u d-dispożizzjoni tiegħu; 
• Tissorvelja u timmaniġġja l-attivitajiet marbuta mal-ġenerazzjoni tal-ilmijiet taż-żibel (leachate); 
• Ittejjeb l-attivitajiet relatati ma’ emissjonijiet fl-arja, inkluż trab u riħa; 
• Tnaqqas il-konsum tal-elettriku; 
• Timplimenta miżuri ta’ tħejjija għall-emerġenzi biex tnaqqas u tikkontrolla r-riskju ta’ nar; 
• Timmotiva u tgħallem lill-impjegati permezz ta’ taħriġ (formali u fuq il-post tax-xogħol). 

Din il-politika għandha tkun ikkomunikata ll, u mifhuma mill-impjegati kollha fl-organizzazzjoni. Aħna ser inkunu qed nikkomunikaw din il-politika  mal-pubbliku, mal-viżitaturi u mal-kuntratturi fil-Faċilità.